Tematikk

NB! Avsløringar førekjem.

Svøm med dem som drukner er ei slektshistorie kor mange tema vert teke opp, og fletta inn i kvarandre. Dei mest sentrale er familie, tilhøyrsle og krig. Historia viser korleis tilfeldigheiter, hendingar og relasjonar mellom menneskje påverkar kven me er.

Romanen inneheld historier frå både fyrste og andre verdskrigen, og desse er viktige for forteljinga. Slaget ved Somme, arrestasjonen av Edvards franske familie, og bestemoras liv i kvinneleiren Ravensbrück er døme på slike hendingar. I tillegg deltok brødrane Sverre og Einar på kvar si side under andre verdskrigen. Me får høyre om enkeltpersonars skjebnar, og dette gjer det heile veldig nært. 

Temaa er like aktuelle i dag, sjølv om no-situasjonen i romanen er 1990-talet. Me er veldig opptatt av opphavet vårt i dag au, om ikkje meir enn nokon gong. Det vert stadig lettare å finne informasjon om forfedrane sine. I tillegg til temaa eg antyda over, er tidlause tema som kjærleik, sakn og von skildra. Dette er noko alle har eit forhold til.

Svøm med dem som drukner har, som nemnt i innlegget om språklege verkemiddel, mange detaljerte skildringar og utgreiingar. Desse går på både personar, hendingar og ikkje minst miljø. Skildringane av spesielt miljøet har underliggande symbolikk. Symbolikken forsterkar temaa i forteljinga.

«Det du ser er arr,» sa han. «Treet må kapsle inn skaden og vokse videre. Årringene finner seg omveier. Strekker seg over såret.» (s. 38)

Flammebjørka er det mest framståande symbolet i forteljinga. I bjørkeskogen sin har Einar spent flate, rustne jernband rundt trea. Då Edvard var mindre skjønte han ikkje korfor Einar ville plage dei, og han var takksam for at tre ikkje kan rope når dei har vondt. For at bjørka skal kunne oppstå som noko finare, sterkare og meir eksklusivt, altså flammebjørk, må ho fyrst skadast. Vonde opplevingar og erfaringar former deg, og vil gjere deg sterkare.

«Plutselig mistet jeg balansen. Et par sekunder trodde jeg, fullt og helt, at hele øya løsnet fra jordskorpen. Men det var bare stormen jeg hadde lent meg mot, som brått spaknet. Like etter roet bølgene seg, som om de innså at de var alene i et villmannsritt og nå savnet vinden.» (s. 232)

Anna framståande symbolikk er vêret på Shetland. Vêret på Shetland er usikkert, øydeleggjande og valdsamt. Her kan me trekke direkte parallellar til forholdet Edvard og Gwen utviklar. Edvard har barndomskjærasten Hanne heime i Saksum, og han er usikker på Gwen eigentleg er. Edvard får i tillegg greie på mange opprivande og vonde ting på Shetland.

Symbolikken kan vere vanskeleg å få tak i før ein har lest heile boka, sidan han er så gjennomgåande.